ايه اللي بتحتاجه من منتجات التضخيم؟

على الرغم من أن المشكلة الرئيسية عند معظم الناس هي أنهم عايزين ياكلوا اللي هم بيحبوه من غير ما وزنهم يزيد، إلا أن في اللي عندهم مشكلة عكسية.. محتاجين وزنهم يزيد بأي طريقة. بس قبل ماتقرر تاخد أي مكمل غذائي، لازم تعرف هتاخده ليه وازاي وأيه المميزات اللي بيقدمهالك وأيه الفرق بينه وبين المنتجات التانية اللي زيه.

خلينا الأول نتكلم عن أسباب فقدان الوزن:
- ممكن يكون وراثياً بسبب التركيب الجيني.
- وممكن يكون بسبب الهرمونات وبسبب ارتفاع معدلات التمثيل الغذائي أو الحرق.
- وممكن يكون بسبب زيادة المجهود البدني وسوء التغذية.
- وممكن يكون بسبب بعض الأمراض العضوية أو النفسية.

علشان كدة قبل ما تفكر في أي مكمل، المفروض الأول تفهم سبب فقدان الوزن وتعالج أي مشكلة موجودة مع متخصص، وبعد كدة بتحط خطة تغذية مناسبة لنفسك، وبعدين تشوف الخطة دي أيه اللي ناقصها أو اللي مش هتقدر توصله فيها عن طريق التغذية وتاخده من المكمل.

وبالتالي كل الكلام اللي جاي للأفراد اللي ماعندهمش أي مشاكل جسدية أو نفسية أو وراثية أو هرمونية:
في العادي الجسم بيستخدم الغذاء اللي بتوفرهوله للحصول عالطاقة اللي بيحتاجها علشان يؤدي وظايفه الطبيعية. لو انت نايم عالسرير ومابتعملش أي حاجة جسمك بيحتاج حوالي 2000 كالوري في المتوسط، ودول بيستخدمهم القلب والمخ والأعضاء الداخلية الأخرى والعضلات لأداء وظايفها الطبيعية.

وبالتالي، لو مابتعملش مجهود واستهلكت 2000 كالوري يومياً، فجسمك هيسخدمهم ووزنك هيكون ثابت. ولو استهلكت مثلاً 3000 كالوري في الحالة دي فالجسم هيستخدم الـ 2000 كالوري اللي محتاجهم والـ 1000 الزيادة هتتحول لدهون ويتم تخزينها في مناطق مختلفة.

والعكس صحيح، لو روحت الشغل وبعدين اتمشيت شوية علشان ترجع بيتك، وبعدين عملت بعض الأعمال المنزلية، وغيره، فجسمك في الحالة دي مثلا استخدم حوالي 3000 كالوري بدل 2000، وانت اخدت من الأكل 2000 بس، جسمك هيبدأ يكسر في العضلات ومخازن الجليكوجين ثم الدهون علشان يعوض فرق الطاقة اللي محتاجها. 
ده كده شرح مبسط لموضوع السعرات الحرارية والفائض والعجز.
بس الموضوع مش بالبساطة دي، علشان مش كل السعرات بتوصل لنفس النتيجة... 

طريقة تعامل الجسم مع السعرات اللي بتدخله من البروتين غير طريقة تعامله مع السعرات اللي بتدخله من الكارب:
على سبيل المثال، جرام البروتين وجرام الكارب كل واحد فيهم بيدي 4 كالوري.
بس مش معنى كدة ان 30 جرام من السكر، هيكون ليها نفس تأثير 30 جرام من البروتين.

كل عنصر غذائي ليه فوايده الخاصة لجسمك:
الكربوهيدرات هي مصدر للطاقة.
البروتين  الجسم بيستخدمه لبناء وإصلاح العضلات.
والدهون بتنظم إنتاج الهرمونات.
والفيتامينات والمعادن بتنظم عمليات الامتصاص والتمثيل الغذائي وعمل الهرمونات والأنزيمات.

حتى على مستوى العنصر الواحد الموضوع مش بالبساطة دي:
فالكربوهيدرات، على سبيل المثال، موجودة في أشكال سريعة الامتصاص زي السكريات واللي تعتبر مصدر طاقة مهم للعضلات.
وفي أشكال تانية من الكارب بطيئة الامتصاص زي النشويات التي بتوفر طاقة برضو لكن مابترفعش مستويات الأنسولين بسرعة زي السكريات.
وفي من الكارب اللي بيكون معقد لدرجة ان الجسم مابيمتصهاش أصلاً ولا بتدي أي سعرات زي الألياف اللي بتنظم حركة المعدة وبتساعد في امتصاص العناصر الغذائية التانية.

البروتين بيبني العضلات زي ما قولنا، وبيزود الجسم بالأحماض الأمينية الأساسية اللي مابيقدرش ينتجها بنفسه، وهي 9 أحماض أمينية وموجودة بالكامل في البروتين الحيواني.
فلو بدلت البروتين الحيواني بالبروتين النباتي، ساعتها لازم تجمع بين أكثر من نوع لأن البروتين النباتي مابيحتويش على كل الأحماض الأمينية الأساسية التسعة التي بيحتاجها الجسم.

وكمان توقيت امتصاص البروتين مهم لأنك، على سبيل المثال، لو اخدت 50 جرام من البروتين سريع الامتصاص فجسمك هيمتصها كلها مرة واحدة... ومش هيستخدم غير اللي بيحتاجه منها في الوقت ده، اللي هو من 25 ل 30 جرام بالكتير، والباقي هيتم إخراجه من الجسم عن طريق الكبد علشان مافيش وسيلة لتخزين البروتين في الجسم.

وعلشان كدة لما بتروح تشتري منتج تضخيم بيديلك 200 جرام كارب سريعة الامتصاص "أو سكر" و 50 جرام بروتين سريع الامتصاص، فانت في الواقع بتضر نفسك بفلوسك.
لأن جسمك هيستخدم حوالي 50 جرام من الكارب ده والباقي هيتحول لدهون في مناطق هتضايقك، والـ 50 جرام بروتين التي أخدتها، هتستخدم نصها والنص التاني هينزل في الحمام.

وعلشان كدة بنقول انك لازم تكون فاهم جسمك كويس وفاهم احتياجاته قبل ما تقرر تستخدم أي مكمل...
هنتكلم عن تفاصيل اكتر في البوستات الجاية.. تابعونا!
ضخم على نضيف